Herzlichs Grüaß Gott

Herzlichs Grüaß Gott en Bada-Würddaberg

Sieba Freilichtmusea onder freiam Hemmel geid’s en unsra Gegend, also en Bada-Würddaberg. Do erfärsch elles aus am Leba, vom Schaffa ond wia se mal bei ons gläbd hend. Do muascht obedengt vorbeigugga. Do wirschglotza ond schdauna bei ons em Freilichtmuseom em Kreis Esslenga. A scheene Landschaft midda en Würddaberg glei bei Schduagerd (Stuttgart) isch’s drzua no.

Nomol herzlich Grüaß Gott em Freichlichtmuseom Beira!

Komm gugg und schdaun über onser Sach ond über des was mr gschpart ond zemaghalda hend.
Bei ons goht’s emmer zua wia auf dr Kirbe. Do derfsch et bloss so herfahre ond dia 25 Baura- ond Wohnheisr vom Neckar ond dr Alb blos agugga. Noi da muaschd au Deine Kender ond Oma mitbrenga, oifach mit Kend ond Kegel komma und mitmacha bei de Feschdla. Weil da gibt’s emmer äbbas Guats für dr Maga ond fürs Gmüat. Entweder en dr gmüatliche Wirtschaft oder onderm Birabohm em Garda.

Deine Kender werdat schdrahle ond Glotzböbbel aufschberra ond dia werdet no ihre Kender schbäder davo erzähla. Von de Henna, Hasa, Schoof ond Goisa ond nadirlich vom Dande-Emma-Lada wia früer bei der Nochberre an dr Eck wo’s ellas gebba hod. Jo sogar no Bomboo aus denne dicke Bomboogläser direkt end Hend.

Dia 25 Museomshäuser zoigad Dir von denne Leid dia do früer glebt ond gschaffd hend. Ausser Bauraheiser, Schdäll ond Scheura send Wohnonga ond Wergschdädda von de Handwerker mit ihre Familia, also dr heidiga Middelschicht. Au a Haus vom a Webr mit Webrdonk von dr Alb ra isch drbei, au a Baurahaus mit-dra ganza Schreinerei, a für de domolig Zeit a ganz moderns Fotoatelier ond no a Kalkofa ond a Haus vom Schuldes mit dr Lehrerwohnung. Jedes Haus kosch selber ganz alloi agugga.

Em Museomsbackhäusle wird emmer wieder backa. Der Backofa wird wia früer mit Holz gschürt. Was glaubsch wia dia süsse Schtückla , dia Dätscher ond’s Brod an so am a Dag dir guad schmeggad.

Des ganze druckte Programm gibt’s ommasonschd, was für en Schwaba ja ganz wichtig ischd, glei em Museom oder uff dr haumpedsch (homepage). Des isch englisch ond hoist hald so em Komputr.

Ond nomal ebbas zom Schluss: En Beira sodschd no obedengt ens Wassr naihopfa. Von onda aus 700 Medder kommt a hois Wassr, Thermal-Mineralwasser, also so a bissle wia hoiser Schprudel. En deam Rondomschwemmbad (Panorama Therme) gibt’s Bekka enna ond aussa wo da romschwemma koschd ond wo drs nochher saumäßig guad goht. Friar haot ma au Altweiberwäschdag dazu gseid.

Wia kommt mr no?
Mit am Zuag von Schduagard (Stuttgart) übr Nirdinga (Nürtingen) bis zom Bahhof Neiffa (Neuffen).Von do weidr mit am Bus 179 odr 199 bis Beira direkt vor’s Museom.
Gugg bei vvs.de
Ond wenn da mit deim Karra (Blechkischd oder Benzinkudsch) also deim Heiliga Blechle kommscht:
Von dr Autobah A8 muaschd en Kircha-Ost (Kirchheim-Ost) raus noch Aua (Owen) ond Beira (Beuren). Am Museom ischd dann a mordsmäßg grauser koschdaloser Parkplatz.

Also gell kommad mir freuad uns uff Euch!

So hoist d’Adress:

Freilichtmuseum Beuren
In den Herbstwiesen
72660 Beuren
Telefon 0 70 25 / 9 11 90 – 90

Museumskass (direkt am Eigang vom Museom)
Telefon 0 70 25 / 9 11 90 – 50

Haumpedsch (homepage)
www.freilichtmuseum-beuren.de

Ihmail (E-Mail)
info@freilichtmuseum-beuren.de

Des koschted dr Aidritt ens Museom
Erwagsene zahlad: 7,00 €
Kender zahlad: 3,50 €
Mit dr ganza Familie koschts: 15,00 €

Des Museom hot fascht emmer offa
Von April bis Oktober (oder au no länger)
jeden Dag von 9.00 bis 18.00 Uhr isch offa
Aber Obacht: Mondags hot des Museom gschlossa!